I. KAFLI.
Um nafn, heimili, varnarþing og tilgang.


1. gr.

Félagið heitir Samtök fiskvinnslustöðva, skammstafað SF. Heimili samtakanna og varnarþing er í Reykjavík.

2. gr.

Tilgangur samtakanna er:

Að sameina í ein hagsmunasamtök öll fyrirtæki sem vinna að framleiðslu og/eða sölu sjávarafurða og vera málsvari þeirra út á við.

Að koma á framfæri við stjórnvöld og almenning afstöðu samtakanna til þeirra mála er varða hagsmuni félagsmanna og fylgja þeim fram.

Að tryggja að réttur félagsmanna sé ekki fyrir borð borinn, hvorki af löggjafarþingi né öðrum.

Að stuðla að starfsmenntun, vöruvöndun og aukinni framleiðni í fiskvinnslu og koma á samvinnu meðal félagsmanna um þau mál.

Að fylgjast með breytingum sem verða á fiskvinnslulöggjöf annarra þjóða og gæta hagsmuna íslenskrar fiskvinnslu að því er varðar samkeppnisstöðu, samninga og samskipti Íslands og annarra ríkja eða ríkjabandalaga.

Að stuðla að því að vinnufriður haldist í fiskvinnslu með því að leitast við að koma í veg fyrir verkföll og verkbönn með friðsamlegum samningum í samstarfi við Samtök atvinnulífsins.



II. KAFLI.
Aðild að samtökunum.


3. gr.

Inngöngu í samtökin geta fengið öll starfandi einkafyrirtæki, félög eða sjálfseignarstofnanir sem vinna að framleiðslu og/eða sölu á sjávarafurðum og aðildarfélög þeirra.


4. gr.

Samtök fiskvinnslustöðva eiga aðild að Samtökum atvinnulífsins. Innganga í SF eða aðildarfélag þeirra felur jafnframt í sér beina aðild að Samtökum atvinnulífsins með þeim réttindum og skyldum sem kveðið er á um í samþykktum SA.


5. gr.

Umsókn um inntöku í SF skal senda skriflega til stjórnar samtakanna ásamt upplýsingum um stjórn, stjórnendur, starfssvið, launagreiðslur og veltu. Inntökubeiðni telst samþykkt ef meirihluti stjórnar samþykkir hana. Skjóta má synjun á inntökubeiðni til aðalfundar eða félagsfundar.



III. KAFLI.
Úrsögn og brottviknin.


6. gr.

Heimilt er félagsmanni að segja sig úr samtökunum frá áramótum að telja með minnst sex mánaða fyrirvara. Úrsögn skal vera skrifleg og afhendast framkvæmdastjóra sem skal gefa skriflega viðurkenningu við móttöku hennar. Þó er óheimilt að segja sig úr eða fara úr samtökunum á meðan á vinnudeilu stendur. Úrsögn eða brottvikning leysir ekki aðilda undan greiðslu félagsgjalda eða annarra skuldbindinga sem á honum kunna að hvíla.


7. gr.

Stjórn SF er heimilt að víkja aðildarfyrirtæki úr samtökunum vegna vanskila eða öðrum brotum gegn samþykktum þessum. Til þess að brottvikning öðlist gildi skal stjórnin boða til félagsfundar þar sem ástæður fyrir brottvikningu eru greindar. Samþykki þrír fjórðu hlutar fundarmanna brottvikningu telst hlutaðeigandi fyrirtæki vera vikið úr samtökunum. Stjórninni er heimilt að nema af félagaskrá þau fyrirtæki sem hafa ekki greitt árgjöld sín til samtakanna um tvö ár eða lengur eða eru hætt störfum.


IV. KAFLI.
Félagsgjöld.


8. gr.

Aðalfundur skal árlega ákveða árgjald til samtakanna. Árgjald skal reiknað sem hundraðshluti af heildarlaunagreiðslum næstliðins árs, nú 0,23% af sama stofni. Stjórn samtakanna skal ákveða lágmarksgjald fyrir hvert ár. Þá er samtökunum heimilt að innheimta þóknun fyrir sérgreinda þjónustu við einstök fyrirtæki. Áætla skal árgjald á meðan upplýsingar um heildarlaunagreiðslur liðins árs liggja ekki fyrir. Heimilt er að áætla félagsgjald á fyrirtæki sem ekki gefa upp grunn félagsgjalda. Nýir félagar greiði félagsgjald frá og með þeim ársfjórðungi sem er að líða þegar þeir eru teknir í samtökin. Þeir sem segja sig úr samtökunum greiða félagsgjald til næstu ársloka frá úrsögn, en hætti fyrirtæki á árinu greiðir það félagsgjald til loka þess ársfjórðungs, sem stjórn er tilkynnt að fyrirtæki sé hætt að starfa. Þegar brottvikning á sér stað skal greiða félagsgjald til loka þess ársfjórðungs sem brottvikning fór fram. Árgjöld skulu innheimt árlega eða ársfjórðungslega eftir nánari ákvörðun stjórnar. Eindagi er einum mánuði eftir gjalddaga.



V. KAFLI
Aðalfundur


9. gr.

Aðalfund samtakanna skal halda eigi síðar en 31. október ár hvert og skal boða til hans með minnst þriggja vikna fyrirvara með tilkynningu til sérhvers félagsmanns. Aðalfundur er lögmætur ef löglega er til hans boðað. Formaður SF setur aðalfund og tilnefnir fundarstjóra og fundarritara.


10. gr.

Á aðalfundi skal taka fyrir eftirfarandi mál: Formaður gerir grein fyrir starfsemi samtakanna á liðnu starfsári. Reikningar samtakanna fyrir liðið reikningsár. Kosning stjórnar. Kosning tveggja manna til að endurskoða reikninga samtakanna fyrir líðandi ár og skal annar þeirra vera löggiltur endurskoðandi. Umræður og atkvæðagreiðslur um önnur mál, sem borin hafa verið fram með löglegum hætti. Um aðalfund fer að öðru leyti eftir VII. kafla.



VI. KAFLI
Stjórn, framkvæmdaráð og framkvæmdastjóri


11. gr.

Stjórn samtakanna skipa sautján menn og skulu þeir kosnir í skriflegri atkvæðagreiðslu á aðalfundi. Stjórnarmenn eru kosnir til tveggja ára og ganga níu þeirra úr stjórn annað árið en átta það næsta. Stjórnin skiptir með sér störfum og kýs formann og varaformann.


12. gr.

Stjórnin heldur fundi, þegar formanni þykir við þurfa en auk þess er honum skylt að boða til fundar þegar þrír stjórnarmenn krefjast þess. Stjórnarfundur er því aðeins lögmætur að minnst níu af stjórnarmönnum sæki fundinn Framkvæmdastjóri hefur rétt til setu á fundum stjórnar með málfrelsi og tillögurétt. Gerðir stjórnarfunda skal bóka í gerðabók samtakanna. Stjórnin ræður öllum félagsmálum milli funda. Stjórnin tilnefnir fulltrúa SF í fulltrúaráð Samtaka atvinnulífsins. Stjórnin tekur til meðferðar öll mál, sem geta ekki talist dagleg afgreiðslustörf samtakanna. Þau störf felur stjórnin framkvæmdastjóra að annast um, auk annarra framkvæmdastarfa, að svo miklu leyti sem stjórnin telur hentugt á hverjum tíma.


13. gr.

Framkvæmdaráð fer með umboð stjórnarinnar á milli stjórnarfunda. Í framkvæmdaráði sitja auk framkvæmdastjóra: Formaður, sem jafnframt er formaður ráðsins. Varaformaður samtakanna. Tveir stjórnarmenn, kjörnir af stjórninni til eins árs í senn.


14. gr.

Stjórn SF ræður framkvæmdastjóra samtakanna og setur honum starfsreglur. Framkvæmdastjóri annast dagleg starfsemi samtakanna í samráði við stjórn. Hann ræður starfsfólk til skrifstofunnar, sér um innheimtu félagsgjalda, allt reikningshald og afgreiðslu og undirbúning mála.



VII. KAFLI.
Félagsfundir


15. gr.

Lögmætir félagsfundir hafa æðsta vald í öllum málum samtakanna innan þeirra marka, sem samþykktir þessar setja. Rétt til að sækja félagsfundi og fara með atkvæði þar hafa stjórnendur aðildarfyrirtækja eða umboðsmenn þeirra. Heimild til fundarsetu með málfrelsi og tillögurétti hafa starfsmenn SF og aðildarfélaga þess auk gesta. Félagsfundi skal halda þegar stjórn samtakanna þykir þurfa, eða þegar þess er krafist fyrir hönd félagsmanna, sem hafa umráð yfir minnst 1/5 hluta af atkvæðum félagsmanna, enda komi jafnframt fram hvers vegna fundar er krafist. Kröfu um félagsfund skal senda stjórn samtakanna og ber henni að boða til fundarins innan þriggja daga, með svo skömmum fyrirvara, sem heimilt er samkvæmt lögum þessum.


16. gr.

Félagsfundi skal boða með tilkynningu til sérhvers fyrirtækis með minnst einnar viku fyrirvara, nema vinnustöðvun sé yfirvofandi eða aðrar jafnbrýnar ástæður réttlæti að boðað sé til fundar með skemmri fyrirvara. Í fundarboði skal stuttlega getið þeirra mála, sem taka skal fyrir á fundinum. Heimilt er þó á fundi að taka fyrir og leiða til lykta málefni, sem eigi er getið í fundarboði, nema öðruvísi sé ákveðið í lögum þessum, enda sé það samþykkt með 3/4 hlutum greiddra atkvæða fundarmanna. Fundur, sem boðað hefur verið til með löglegum hætti, er lögmætur, án tillits til þess hve margir sækja hann, nema öðruvísi sé ákveðið í lögum þessum.


17. gr.

Hverjum fundi stýrir kjörinn fundarstjóri. Fundarstjóri kveður sér fundarritara úr hópi fundarmanna. Atkvæðagreiðsla skal jafnan vera skrifleg, ef einhver atkvæðisbærra fundarmanna krefst þess.


18. gr.

Á félagsfundum hafa félagsmenn atkvæðisrétt sem hér segir: Leggja skal til grundvallar fyrir atkvæðatölu hvers einstaks félagsmanns heildarupphæð greiddra félagsgjalda fyrir undanfarið ár og skal vera eitt atkvæði fyrir hverjar heilar 1000.- kr. -eittþúsundkrónur-. Þó getur enginn einstakur félagi farið með meira en 1/10 hluta af öllum atkvæðum félagsmanna. Skrifstofa samtakanna skal við hver áramót semja skýrslu yfir atkvæðamagn hvers félagsmanns eða deildar og gildir skýrslan að þessu leyti allt árið. Nú hefur einstakur félagi ekki verið í samtökunum heilt ár, þegar skýrslan um atkvæðamagn er gerð, og skal honum þá ákveðið atkvæðamagn í samræmi við lágmarksgjald, eins og það er á hverjum tíma ákveðið af félagsstjórn, þar til tillag hans á árinu nemur hærri fjárhæð. Félagsmenn mega fela þeim, sem geta sótt félagsfundi samkvæmt 15. gr., að fara með atkvæði sín. Fundarstjóri getur krafist skriflegs umboðs.


19. gr.

Í gerðabók samtakanna skal rita stutta skýrslu um það sem gerist á félagsfundum. Fundarstjóri og fundarritari undirrita síðan fundargerðina.



VIII. KAFLI
Ársreikningar


20. gr.

Starfsár samtakanna og reikningsár er almanaksárið. Tveir endurskoðendur, annar þeirra löggiltur, skulu kosnir á aðalfundi. Þeir skulu endurskoða reikninga samtakanna fyrir yfirstandandi ár, kanna sjóði þess í árslok og gera athugasemdir sínar til stjórnar samtakanna.


21. gr.

Fyrir lok marsmánaðar ár hvert skal skrifstofa samtakanna hafa lokið við ársreikninginn fyrir liðið starfsár og sent hann endurskoðendum. Viku fyrir aðalfund skulu endurskoðaðir ársreikningar liggja fyrir á skrifstofu SF félagsmönnum til kynningar.



IX. KAFLI.
Ýmis ákvæði


22. gr.

Samþykktum samtakanna verður ekki breytt nema á lögmætum aðalfundi, enda hafi þess verið getið í fundarboði, að breytingar á samþykktum yrði til meðferðar á fundinum, og sé breyting samþykkt með 2/3 hlutum greiddra aðkvæða að minnsta kosti.


23. gr.

Þyki rétt og nauðsynlegt að leggja SF niður, fer um tillögur þar að lútandi eins og um lagabreytingar, sbr. 22. gr. Fundur sá sem samþykkir löglega að leggja SF niður, kveður einnig á um ráðstöfun eigna þeirra og skulda.


24. gr.

Samþykktir þessar öðlast þegar gildi og falla jafnframt úr gildi eldri samþykktir Samtaka fiskvinnslustöðva. Til staðfestu undirskrifar stjórn samtakanna.

Þannig samþykkt á aðalfundi SF 17. september 1999.